Maškare počele a Korčula nikako “oživit”

MAŠKARE POČELE A KORČULA NIKAKO „OŽIVIT“

Smrznu mi se nos od ove bure.Stojin na kantunu od Dubrovačke banke, di redari Hobera čistu desetak osmrtnica, što in je „pasalo vrime“.

Lipu se druge obavijesti! Plakati o koncertu Maje Šuput u Blato. Velika maškarada u Žrnovo udruga „Vilani“. Prodaje se niki auto i prikolica. Bali u Velon Luci.“Kratki spoj“ nigdi trese narodnjake po škoju… itd .. itd.

A ode u momu mistu ništa. Briči bura, lipu se osmrtnice i život prohodi. Frmaju me niki i svi isto govoru; “ma jedva čekamo tvoj BAVUL na Radio Korčuli, jerbo nas vratiš bar na kratko u onu prošlu lipu našu Korčulu“.

Spominju se i faculeti puni suza poslin tih mojih emisija, a ja se pomalo i sramin,  ka me ovoliko hvalu i spominju.

Vitar mi je doni vonj od nikega šuga za njoke i iša san tin tragon koji me je doni… di nego u „moju“ štradu, našu štradu di je živi kraj od maškara šjor Nikša. Likar od Krnovala šjor Roko. Branitelj Rudolfo i tužitelj Igor.

Učini mi se grop u grlo. Sa dva skalina do pošte uze san jednu kuvertu izvadi iz nje jedan zapis, kjojega dilin ovi put svama. Može bit da će se učinit u nastavke!??

Gren put doma zakapotan, bareta samo što ne poleti iz glave, a misal uvik ista „ka če mi misto oživit ??!“

[youtube]http://www.youtube.com/watch?v=RlYiE4nHrTg[/youtube]

Tonči Gatti

Pošalji dalje: