Maškarana priredba školske dice

12.1.2010. je u popodnevnim satima,u graskoj kristalnoj bal dvorani liburna održana maškarana priredba školske dice.

I ovega godišča vridne učiteljice razredne nastave osnovne škole “Petar Kanavelić”, armale su sve svoje snage i učinili smo feštu. Najpervo su skupa s dičicon u razred promislile što bi to bilo lipo za ovogodišnju priredbu. Onda su se ukjučili roditelji. Mame, none, tete, starije sestre i zainteresirani muški u kuču.

Dobavili su sve što je bilo potriba. Ka je sve tako lipo krenulo ušli smo i “mi” u cilu priču. To hoču reč mi bonkuloviči. Kako smo ovega godišča bili malo defektni jerbo nan je prešidente od vlade Lukič-Kosorič bi na pripreme u Zagreb,skroz smo zaboravili da imamo ote mlade snage u našon fameji. Ajme kako nan je bilo drago ka smo to čuli!

Armali smo kristalnu bal dvoranu liburna, spremili smo ništo malo poklona od dida mraza i nadožuntali još nike salvaomine za se kupa što smo hi imali u bavulu od prošlega lita. Naštampali smo čertifikati su sličicon za uspomenu i dugo sječanje i fešta je mogla poče. Jedino nas je tradilo vrime. Kišilo je i ni se moglo poč priko plokate za učini malo šušura!

Svo zlo s tin!

Ka smo došli pod krov od kristal-bal dvorane, ni nas više ni bilo briga za kišu. Lipo smo uputili feštu i zdrucali i zabavjali se cile dvi ure!

Svaki razred ima je svoju masku i nastup. Bilo je tun i šnješkoti i gljiva i piliča i kokoši i semafori i kupusa i sira i mlika i zekoti i morskih beštija i riba perfin i marko polo!

Malo nan je bila kratka žica od mikrofona, ma isto smo se snašli. Bljeskali su fotografski aparati, zujale su kamere, sparavali su balini, a tamburin je potlin svima napuni glavu!

Jednon riči – krasna mala fešta od maškara. Prava je šteta što ni bilo više puplike, ma ne za nas nego za vas što niste bili. Propustili ste puno. Dogodišča držite napamet i pridružite nan se u grasku kristalnu bal dvoranu (pa koja bude da bude!).

A sa, je red da rečemo točno što se prestavjalo i koji je razred što bi.

-1.a- semafor

-1.b- zečići

-1.RAZRED račišće- zdrava hrana

-2.a- gljive

-2.b- koka i pilići

-3.a- marko polo

-3.b- grožđe

-4.a- baka zima,snjegovići i pahuljice

-4.b- more i zaštičeni stanovnici mora

Morate znat i ovo. Maškarana priredba dice osnovne skule ni bila tek samo priredba. Bi je to cili školski projekt. Kostimi su se izrađivali u razredu i to cila tri dana. I roditelji su bili aktivno prisutni. Šilo se i pituravalo. Učilo se plesat i deklamirat, a niki djelovi kostima dobavili su se perfin priko interneta!

Bravo, bravo, bravo naši !!!

Pošalji dalje: