Vaši èlanci: Zdravo moja Prigradica vala

"Je si li doni pasose za stit u bursu!"- viknula mi je Ona dole iz hodnika, dok san jan jos nisto ramprdja po kamari. "Ma ne recu se pasosi vrazi te izili,  to se sad lipo po naski rece putovnica, oli to jos nisi naucila", bila je moja uobicajna korekcija

"Je si li doni pasose za stit u bursu!"- viknula mi je Ona dole iz hodnika, dok san jan jos nisto ramprdja po kamari. "Ma ne recu se pasosi vrazi te izili,  to se sad lipo po naski rece putovnica, oli to jos nisi naucila", bila je moja uobicajna korekcija i doprinos cistoci materinskog jezika u tujen svitu. To da dica sve manje govoru s nama na hrvaski , to se je jos i moglo skonsumat, ali Ona da mi spominje nike tudjice, to mi je islo na zivce. Ma za rec posteno i ni mi to toliko islo na zivce jer i meni se zna ispuznut koja iz "zajednickog" jezika, nego ovo meni uvik dojde ki ventil kad me capaju nervi prin put. I tada se dica maknu, umuknu, podsmijavaju se, buskaju se i hihiscu jer znaju da ce Ona meni, a perke ja njon vadit mast, brontulavat i iscat svaku mentu za skocit jer nan je udija dezgusto se zaputit put Doma i ucinit one silne i duge ure u avijonu.                      

Prin samega puta te drzi nika furija, krerjanca i mislis da bi se dobota moga uputit i nanoge, pogotovo ako te je zatekla malo duza radna trapula da nisi moga skupit vrimena i ucinit pet-sest setemani lipo u Prigadici sa famijon i prijatejima. Uglavnom smo se to jutro skupili i zaputili put aerodroma. Zaboravi san pripomenut da one putovnice nisu bile hrvaske vec australske,  sto hoce rec da smo islica pud Doma ki "turisti" ali opet nikako domaci. Kako se vazme.            

Na carini su nas odma dobro ispitali, bogati kako da smo teroristi. Je li nosimo ono, ili imamo ono drugo, malo su nas i zajebavali poradi kila, jer ih je bilo i svu sest-sedan viska. Tu smo se dobota Ona i jan popravo zgambali, jer san jon lipo govori da ni potriba kupovat one silne pizdarije, jer da Doma ni vise komunizan i da nas je lipota zapjusnu potrosacki val iz zapada. Ali ona ne, nego po svoju, i da nisan poce curominkat onoj bjondon australki za salteron kako je Hrvatska veliki turisticki hit i kako cu jon ucinit sve moguce usluge ako se odluci zaputit je vidit, ko zna kako bi to bilo zavrsilo. Soma smo se ukrcali i nabili medju onega silnega svita sto je isto odluci poc zavirit zavicajne lipote i zalit svoje nasljedno korenje su domacon kapljicon i prijatejima. Za koje se naravno nadas da su jos prijateji i da vrime i dajina nisu ucinili svoje.             

"Makni ti lakat, probila si mi rebra i nemoj puhat u mene, dosta mi je sto onen isprid nas smrdu noge", zarezan san u niko gluho doba noci na Nju, tamo nigdi visoko iznad Dalekog istoka. Dobota san poce i rezat i svajat se i sa Markon Polon, jer da on ni isa prvi iz naseg skoja tako, pun jarac daleko prima istoku, mozebit da bi i jan danas umisto Melbournea, recimo moga bit na "baustelu" u Minhenu. Svi su mi bili krivi i na svih san bi jidan, jer me je ukocilo, jer mi se je grubo pisalo a isprid zahoda jih je bilo vec nikoliko u redu. Nisan se moga izpruzit, stujadresa me ni obadala, jer ima vise posla za kokolit one u prvoj klasi. Grintan, rezin pusen. Kad bi moga bati bi Vladu. I jednu i drugu. Znate sto mislin.             

Singapur je prosa liso, bez puno monadi, osin ako se izuzme da smo morali cekad jednu desetak uri za capat avion za Frankvurt. E, tada san se lipota iseta, i seta, i seta. Tako da su mi noge bile rastegnute i podmazane za drugi zdruc do Evrope. Tada nan je febra pocela malo vise rast, zarumenili su nan se obrazi i pocelo jece tuc u prsima. Kad se blizis Evropi, to ti je iz ove prikooceanske pozicije kako da si prid vratima od kuce. Soma san nikako izdura i ti dvanajest uri drugi zdruc i poce su malo vise pacijence slusat Njene polupospane kontubacije po glavi u vezi dice, skule i danas sutra zenbe. Cudi san se kako ima snage sve to skontavat, kad je meni po pameti samo banja i potriba da se baren splahnen samo ispod spazuha, ako se ne mogu cili stumbat u "bathu". Poceli smo napokon kruzit iznad Njemacke i meni se je opet vrati zivot i kasnije san cak poce i poigravat na mistu dok se cekalo za  kontrolu i ukrcaj put Splita.   

"Gospodine, moze sok i sendvic"- pitala me je jedna nasa lipa mala na nasen jeziku, sto me je jos vise rascaralo i ucinilo kuntentnim jer san zna da san sad vec Doma, neka san jos u avionu i u zraku i neka vise ne mogu mislit na nista ko ne na banju i posteju i spanje. Lipo spanje u onoj posteji sto ce mi je mater nacinit, su bilin lancunima opranim u perlinu, da se bilu kako sto se bili sada meni prid ocima i muti i manta.  U ten deliriju od zadovojstva cutin jos i levandu na blazinji i rakiju travaricu sto cu je popit nakon dvi- tri suhe smokve na gvanceri s mindelima.  I na kraju san malo i zaspa, a Ona me je probudila bas prin nego ce mo vidit kastelanski kanal i vizure Splita.            

 Na salteru za brodske karte stala je isto jedna lipa mala bjonda, samo ovi put nasa. Malo jon se vidilo da zdrucava, jer se sigurno ni ona ni naspala ako je sinoc izasla su prijatejicama ili momkon vanka.  Dilila je te karte i naplacivala priko voje, ali kad san je ja pita da kakvu vezu ima do Korcule, lipo mi je rekla sto sve i kad plovi do mog rodnog skoja. Cili san uzdrknu, ozari se sentimentima i mladelastvom kad mi je rekla da mogu capat katamaran direktno za Prigadicu. "Prigadicu!"- ponovin nekoliko puti, jer nisan odma moga skontat i povezat da ce me mater i otac i brat i nevista i svi moji moc docekat na rivi ki  Blacanina, Prigadicara. 

"Hocu…, dvi karte ce mo do Prigadice!"-dobota san viknu. Ona se je bidna dobota i pripala jer ni znala sto smo sve prosli i sto sad znacit se iskrcat direktno na rivi. Cuti san velikani gust i zadovojstvo jer za rec posteno, oni australski pasos cini od mene i turistu, tako  da san iz Melbournea do Prigadice dospi bas  "direktno".  Kupisan te dvi nase karte do Prigadice i isa s Njon popit kafu u obliznji kafic,  puno kuntenat ki Korculanin, ki Blacanin, i na posljetku ki turista sto je dosa u Hrvasku.             

Dragi moj/moja GG sve je relativno, je li ti se cini?!  Zdravi i veseli bili, vas Mate! 

Pošalji dalje: